Fátt prýðir karlmannsfésið meira en verklegt og vel snyrt yfirskegg og hefur svo þótt um langan aldur. Yfirskeggið er alls staðar í mjög miklum metum en það er þó nokkuð mismunandi hversu miklar þær metur eru – í Albaníu og þar grennd má til dæmis segja að ást og áhugi manna á yfirskeggi jaðri við þráhyggju.

Þannig eru t.d. hvorki fleiri né færri en 27 orð notuð yfir yfirskegg af ýmsu tagi í albönsku; t.d. ‘madh’ sem er gróskumikið yfirskegg, ‘holl’ er mjótt yfirskegg, ‘dirs ur’ nýsprottið yfirskegg, ‘varur’ er yfirskegg sem vex niður en ‘kacadre’ þegar skeggendarnir vísa upp. Loks er ‘rruar’; að hafa rakað yfirskeggið burt og þykir sennilega ekki góð latína (eða öllu heldur albanska)!

Heilbrigðismál eru engin gamanmál fremur en kynjamál, jafnréttismál og fleira því skylt. Nú hefur króatískur skógarhöggsmaður höfðað mál á hendur heilbrigðisyfirvöldum vegna aukaverkana í kjölfar aðgerðar sem hann gekkst undir. Kveðst hinn 56 ára gamli Stjepan Lizacic frá Osijek sæta háði og spotti eftir aðgerðina, og kemur það ekki til af engu.

Málavextir eru þeir að hr. Lizacic þurfti á nýju nýra að halda. Var grætt í hann nýra úr konu og er óumdeilt að sú líffæragjöf bjargaði lífi hans. Eftir aðgerðina komu hins vegar í ljós heldur óskemmtilegar aukaverkanir sem hr. Lizacic hafði ekki verið varaður við fyrirfram og á því byggir hann mál sitt.